Se yon don oubyen yon aktivite komèsyal; Yon ti bat bouch ak PEPA
Tou piti, anpil moun dekouvri yon talan lakay yo, li ka nan nenpòt domèn, yo sèlman wè yo ap briye ladan l. Gen moun ki sèvi ak li pou ede sosyete a vanse, gen lòt ki itilize l pou fè lajan men konpetans sa, èske nou ka konsidere l menm jan ak yon aktivite komèsyal? Se sou sijè sa 4 manm PEPA t ap fè yon ti bat bouch.
Germanie FIEFFÉ louvri deba a pandan li ap defini don , ki se kapasite ki “innée” lakay yon moun, sa ki vle di li fèt ak li, li ka nan nenpòt ki domèn. Debatèz la fè konnen ke yon moun gen dwa pou li sèvi ak don li nan yon aktivite komèsyal paske li rantre nan yon kad libète individyèl ke moun nan genyen, ti orijinalite sa ke li pote nan domèn nan ka ba li yon libète finansye, e sa kapab ede peyi a tou sou pwen ekonomik.
Isaac W. KING ajoute pou li di lè w sèvi ak don w pou fè lajan ou ofri ladiferans, ou benefisye konfyans kliyan yo.
Christopher Verciné pa rantre nan lojik Germanie ak King nan, li fè konprann ke yon don se yon atitid, li fè w jwenn plezi nan sa wap fè a, gen konfyans nan tèt ou kidonk li paka gen menm enterè ak yon aktivite komèsyal paske objektif komès se tire pwofi.
Germanie pran lapawòl pou l di : ”Lè ou itilize don w pou w rantre lajan li vin yon sous motivasyon e li ka fè w dekouvri lòt konpetans ki kache lakay ou”. King te kore sa li di a ak yon egzanp : “Yon moun ki konn fè desen ka fè pase emosyon li nan imaj yo, li ka tire pwofi nan sa”.
Christopher fè kwè olye pou mete talan ou ki se yon pati nan ou nan menm nivo ak yon aktivite komèsyal pito ou eksplwate l.
Lè n ap byen gade, talan ta dwe sèvi pou ede tout yon sosyete men li pa janm gen menm enterè ak yon aktivite komèsyal, men si yon moun itilize don l pou li fè lajan sa p ap deranje anyen nan sosyete a paske avan tou se enterè moun nan ki konte.
Woodnaëlle Anne DÉLICE